चतरामा तयार भयो कोसी ब्यारेजको विकल्प / ९८ प्रतिशत निर्माण सकियो, जुन ३० बाट गाडी गुड्ने ,

  कोसी व्यारेजको विकल्प सप्तकोसीमा अर्को पक्की पुलको निर्माण गरिएको छ । सुनसरीको चतराघाट र उदयपुरको मैनामैनी जोड्ने पक्की पुलको निर्माण ९८ प्रतिशत पूरा भएको छ ।

तोकिएको समय आगामी जुन ३० मै पुल निर्माण पुरा गरी उद्घाटन गरिने जानकारी कम्पनी कालिका कन्ट्रक्सनले प्रालिले दिएको ।
चतरामा पुल बनेपछि सुनसरीको प्रसिद्ध धार्मिकस्थल बराहाक्षेत्र दर्शन गर्न आउने तीर्थालुलाईसमेत सहज हुने छ । पूर्व–पश्चिम राजमार्ग जोड्ने कोसी व्यारेजको विकल्पका रुपमा यो पुल बनाइएको हो ।
पुलको ९८ प्रतिशत निर्माण पूरा भएको कालिका कन्ट्रक्सनको सप्तकोसी पुल निर्माण परियोजना प्रमुख इन्जिनियर छत्र अर्यालले जानकारी दिए ।
२०६५ भदौ २ गते सप्तकोसी कटानका कारण पूर्व–पश्चिम राजमार्ग अबरुद्ध भएपछि सरकारले कोसी व्यारेजको विकल्पमा यो पुल निर्माण थालेको हो । सप्तकोसीमा पक्की पुल बनेपछि पूर्वी नेपालका सुनसरी, उदयपुर, खोटाङ, भोजपुर, धनकुटा, तेह्रथुम र संखुवासभालगायतका बासिन्दालाई आवत जावतमा सहज हुने छ ।
नेपाल सरकारको ७९ करोड १४ लाख रुपैयाँमा निर्माण सुरु उक्त पक्की पुल २ सय ६१.३ मिटर लामो छ । पानीको सतहबाट २० मिटर मुनिबाट पिलर उठाएर निर्माण थालिएको पुलको उचाइ १७ मिटर अग्लो र चौडाई १० मिटर ५० सेन्टिमिटर रहेको इन्जिनियर अर्यालले जानकारी दिए ।
वारी र पारीको पिलरको आरसीसी पुरा गरी ९८ प्रतिशत निर्माण सम्पन्न भएको पुलमा ढलान गर्न मात्र बाँकी रहेको अर्यालले बताए ।
सप्तकोसीको वीचमा तीनवटा पिलरको आरसीसी गरी पुलमा स्टिलटच जडान गरिएको छ । क्यानडाबाट ल्याएको डिआर ४० फाइरिङ मेसिनको माध्यमबाट जमिनमुनिको भागको काम सम्पन्न गरिएको अर्यालले बताए ।
सुनसरीको बराहक्षेत्र र उदयपुरको मैनामैनी जोडने यो पुल तयार भएपछि सुनसरीको धरान, धनकुटा, भोजपुर, तेह्रथुम र संखुवासभावासीलाई बर्दिवास, सिन्धुली हुँदै काडमाडौं आवतजावत गर्न सहज हुने चतराका स्थानीय तिर्थ सिग्देलले बताए ।
पुल निर्माण पूरा हुनै लाग्दा सुनसरीको चतरा, उदयपुरको मैनामैनी, रामपुर ठोक्सिला, बसाहा, फत्तेपुर लगायतका स्थानमा घरजग्गाको भाउ समेत बढ्न थालेको छ ।
यो पुलले सुनसरीको प्रसिद्ध धार्मिकस्थल बराहक्षेत्रमा पर्यटक तथा तीर्थालुलाई आवत जावतमा सहज हुने भएको छ ।